Plantun de Prouvènço

Pèr coumpara dos planto d'encò nostre

Carlina vulgaris & Lilium bulbiferum

Carlina vulgaris

Asteraceae Compositae

Noms en français : Carline commune, Chardon doré.

Descripcioun :
Poulido cardinello que trachis dins li garrigo fin qu'i mountagno mejano. Es uno planto pulèu forto emé uno souleto tijo. Li fueio de la cambo soun penado bourdado d'espino. Fai de poulìdi flour (coumpausado) groupado de 1 à 15 e en pinceloun. Soun li bratèio dóu deforo que soun daurado, li flouroun dóu dedins soun vióulet.

Usanço :
Li flour soun manjadisso coume li di cachofle e li racino peréu. Aquésti èron acampado, à passa tèms (ié disien en latin radix heracanthae) que soun "tounico e estimulanto" pèr la digestioun. Soun vertuouso peréu contro la raumido de pèu (eczema). La racino s'acampo à l'autouno e se fai seca.

Port : Erbo
Taio : 10 à 80 cm
Fueio : basalo
Tipe bioulougico : Emicriptoufite
Cicle bioulougico :

Gènre : Carlina
Famiho : Asteraceae
Famiho classico : Compositae
Tribu : Cardueae

Coulour de la flour : Jauno
Petalo : >6
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : Pancaro entresigna
Aparado : Noun

Liò : Basso mountagno - Colo - Garrigo - Tepiero seco
Estànci : Subremediterran à Mountagnard
Couroulougi : Pancaro entresigna
Ref. sc. : Carlina vulgaris L., 1753

Tonipan

Lilium bulbiferum

Liliaceae

Àutri noum : Peiloulet, Lis-de-Sant-Jan, Flour-dal-sacre-couor.

Noms en français : Lis safrané, Lis orangé.

Descripcioun :
Lou tonipan (Vesubiò) apela encaro peiloulet (Tiniò), pulèu rare, trachis dins li prado e li pendis roucassous de mountagno. Se vèi de liuen e se recounèis eisadamen emé si grosso (5 à 8 cm) e bèlli flour aranjo, pourtado pèr uno cambo cuberto de fueio estrecho, longo e noumbrouso.

Usanço :
Èro acampa pèr n'en faire de bouquet. Li flour, macerado dins l'òli o l'aigardènt servien pèr sougna li macaduro. Aro es apara, marca sus listo roujo, categourìo soucit minour.